Энг янги тарих (1945-2010)

Аннотация

"Энг янги тарих (1918-1945й.)" нинг биринчи қисми 2010 йилда дарслик сифатида нашр қилингунга қадар мамлакатимиз олий ўқув юртлари учун энг янги тарих фанидан ўзбек тилида адабиётларнинг бўлмаганлиги жиддий камчилик бўлиб келди. Ҳозир ҳам олий ўқув юртларида бундай дарслик ёки ўқув қўлланмасига эҳтиёж жуда катта.Бу эҳтиёж ва талабни қисман қондириш мақсадида "Энг янги тарих (1945-2010 й)"нинг иккинчи қисмини ўқув қўлланмаси сифатида нашр этиб, талабаларга тақдим этмоқдамиз.Йигирманчи юз йилликда энг янги тарих ва дунё сиёсати ўз бошидан уч босқични ўтказган бўлса, мазкур ўқув қўлланма иккинчи ва учинчи босқич воқеаларини ўз ичига олган. Булар қуйидагилардир: 1945-1990 йилларни ўз ичига олган "совуқ уруш" даври. Бу давр иккинчи жаҳон уруши тугагандан кейин "совуқ уруш"нинг бошланиши билан бугун дунёда жамиятни инсонпарварлаштириш учун кураш билан, инсон ҳуқуқлари учун мустамлакачиликка барҳам бериш, тоталитар ва мустамлака тузумларни тугаши учун курашлар билан ҳамда жаҳон социализм системасининг барҳам топиши билан характерланади.