Бир ковшли экскаваторнинг ишчи органлари деталларини, ковш тишларини ейилишга бардошлилигини ошириш

Аннотация

Диссертация мавзусининг долзарблиги ва зарурати. Жаҳонда машинасозлик оғир саноатининг ўсиш суръати ва сифатини такомиллаштириш; меҳнат унумдорлиги ҳамда шароитларини яхшилаш мақсадида муайян даражада механизация воситаларининг техник даражасини ошириш; оғир саноат ишлаб чиқаришининг рақобатбардош техника ва технологияларини яратиш; улар устида чуқур фундаментал тадқиқотлар олиб боришнинг илмий-амалий, техник масалаларни ҳал этиш муҳим аҳамият касб этмоқда. Шунингдек, қурилиш, кончилик ва ер ишларининг сифат кўрсаткичларини ошириш муҳим вазифалардан саналади. Бу борада ривожланган мамлакатлар, жумладан АҚШ, Япония, Германия, Хитой, Англия, Польша, Россия ва бошқа мамлакатларнинг илмий-тадқиқот марказларида ишлаб чиқаришда рақобатбардош техника ва технологияларни яратиш мақсади билан ер ва кончилик ишлари ҳажми салмоғининг ошиб боришини ҳисобга олиб, ер қазиш ва кончилик техникасини сифат жиҳатдан яхшилаш ва ундан фойдаланишнинг самарадорлигини оширишга алоҳида эътибор берилмоқда.