Лимон кислотаси асосидаги акрил полимерлар синтези ва уларнинг хоссалари

Аннотация

Диссертация мавзусининг долзарблиги ва зарурати. Бугунги кунда жаҳонда турли амалий масалаларни ҳал қилишда функционал полимерлар катта муваффақият билан қўлланилмоқда. Шунинг учун ҳам гидрофил хусусиятли янги функционал полимерларни синтез қилиш ва уларнинг физик-кимёвий хоссалари аниқлаш бўйича изланишларга бўлган эътибор янада ортиб бормоқда. Ушбу полимерлар тиббиётда, фармакологияда, биотехнологияда, қишлоқ хўжалигида, тўқимачилик саноатида, атрофмуҳит муҳофазасида муваффақиятли қўлланилмоқда. Функционал полимерлар стимул-сезгир тизимлар яратишда, биотехнология ва нанотехнология соҳаларида ҳам катта истиқболга эга бўлиб, улар биологик фаол моддаларни иммобилизация қилиш ва улар асосида пролонгацияланган таъсирга эга бўлган терапевтик тизимлар яратишда алоҳида аҳамият касб этади.